Please reload

Recent Posts

Viðtal við Kópavogsfréttir

August 26, 2014

1/2
Please reload

Featured Posts

Borgarbarn í Kópavogsdrama

August 26, 2014

Borgarleikhúsið frumsýnir nýtt íslenskt leikrit, Bláskjár, á Litla sviðinu á laugardagskvöld. Tyrfingur Tyrfingsson, höfundur verksins, ber sterkar taugar til Kópavogs og hermt er að hér sé á ferðinni fyrsta leikritið í heimi sem gerist í bænum. Arnmundur Ernst Björnsson er einn leikaranna í Bláskjá. Hann gerði mikla lukku í Jeppa á Fjalli og segir Borgarleikhúsið vera frábæran stað fyrir nýútskrifaðan leikara.

 

Tyrfingur Tyrfingsson gegnir stöðu leikskálds Borgarleikhússins í ár og á laugardaginn verður Bláskjár, fyrsta verk hans í fullri lengd, frumsýnt á Litla sviði Borgarleikhússins. Tyrfingur á rætur að rekja í Kópavoginn, rétt eins og leikstjórinn, Vignir Rafn Valþórsson. Það fer því vel á því að leikurinn gerist í Kópavoginum í grennd við Hamraborg en hermt er að hér sé um að ræða fyrsta leikrit í heimi sem gerist í bænum.

 

Arnmundur Ernst Björnsson fer með eitt hlutverkanna í Bláskjá og kann vel við sig í Kópavogi á sviðinu þótt leið hans liggi sjaldan til bæjarins í raun og veru.
„Stemningin í Kópavogi er bara frábær,“ segir Arnmundur. „Þetta er búið að vera virkilega skemmtilegt ferli hingað til og frumsýningin er mikið tilhlökkunarefni hjá öllum hópnum.“

Bláskjár er íslenskt gamandrama, með súrum keim, og fjallar um einlæga löngun tveggja systkina í Kópavogi til að endurnýta sig og byrja lífið upp á nýtt. Arnmundur segir texta Tyrfings töfrum líkastan. „Hann er með svo skemmtilegan stíl og einstakan ritstíl. Það eru einhverjir töfrar sem liggja í textanum hans.“

 

Arnmundur útskrifaðist sem leikari frá LHÍ í fyrra og hefur farið vel af stað og þótti fara á kostum í hlutverki sínu á Jeppa á Fjalli fyrir skömmu. „Já, það gekk mjög vel í Jeppa og ég er fyrst og fremst bara fullur auðmýktar og þakklætis fyrir að hafa fengið þessi tækifæri upp í hendurnar. Og að fá að vinna með svona góðu fólki. Ég held að Jeppi hafi gengið svona ofboðslega vel vegna þess að hópurinn var svo rosalega samheldinn og orkan í honum var svo hrikalega góð.“

 

Leikarinn ungi segir Borgarleikhúsið góðan stað að byrja á. „Já, heldur betur. Ég held ég geti með sanni sagt að Borgó sé einn sá besti vinnustaður sem ég hef unnið á.“

 

Arnmundur deilir ekki sama ástríðufulla áhuganum á Kópavogi og höfundurinn og leikstjórinn enda sprettur hann upp úr öðru umhverfi. „Ég er fæddur og uppalinn í Vesturbænum og á mjög erfitt með að fara upp í sveit eins og Kópavog. Ég er svo mikið borgarbarn. En þeir tveir bera mikla ást til þessa bæjarfélags. Og ég hugsa að það sé nú gott að búa í Kópavogi.“

 

Auk Arnmundar leika þau Arndís Hrönn Egilsdóttir og Hjörtur Jóhann Jónsson í verkinu. Högni Egilsson semur tónlistina og Brynja Björnsdóttir hannar leikmynd og búninga.

toti@frettatiminn.is

 

 

Please reload

Follow Us
Please reload

Search By Tags
Please reload

Archive
  • Facebook Basic Square
  • Twitter Basic Square
  • Google+ Basic Square
This site was designed with the
.com
website builder. Create your website today.
Start Now